Ushqimi që hamë është një nga faktorët kryesorë që mund të shkaktojnë vdekje të parakohshme. Një studim i botuar në revistën botërore mjekësore “The Lancet”, tregon se dieta jonë e përditshme apo mënyra e të ushqyerit është një nga vrasësit më të mëdhenj, madje edhe më vdekjeprurëse se sa duhani.
Dieta e gabuar ushqimore përfshihet në një nga 5 shkaktarët kryesorë të vdekjeve. Përdorimi i tepruar i kripës është tepër i rrezikshëm thonë ekspertët. Sipas tyre, ky studim nuk ka të bëjë me obezitetin, por me dietat me cilësi të dobët të cilat dëmtojnë zemrën dhe shkaktojnë kancer.
Dietat më të rrezikshme janë ato që përmbajnë:
-Dieta me shumë kripë – 3 milionë vdekje
-Dieta me pak grurë -3 milionë vdekje
-Dieta me pak fruta – 2 milionë vdekje
-Dieta me nivel të ulët të arrave, perimeve, omega-3, prodhimeve të detit dhe fibrave.
Rreth 10 milionë vdekje nga 11 milionë të lidhura me dietën, ishin për shkak të sëmundjeve kardiovaskulare, që do të thotë se kripa është një problem madhor. Përdorimi në sasi të mëdha i kripës rrit presionin e gjakut, gjë e cila çon në rritjen e rrezikut të sulmeve në zemër.
Studiuesit kanë përcaktuar edhe shtetet që kanë dietat më të dobishme dhe ato shtete kur dieta ka rritur numrin e vdekjeve. Vendet mesdhetare, veçanërisht Franca, Spanja dhe Izraeli kanë numrin më të ulët të vdekjeve që lidhen me mënyrën e të ushqyerit. Kurse vendet në Azinë Juglindore, Jugore dhe Qëndrore janë në anën e kundërt.
Izraeli ka numrin më të ulët të vdekjeve që shkaktohen nga mënyra e të ushqyerit, 89 për 100 mijë njerëz. Kurse Uzbekistani regjistron numrin më të lartë, 892 për 100 mijë njerëz. /tvklan