Një tjetër raund për zgjedhjen e Presidentit ri është djegur, ku PD dhe PS nuk kanë gjetur një konsensus. Edhe pse kishte një marrëveshje që opozita të propozojë emër për 2 raundet e para, më pas të propozonte PS, asnjë emër nuk është dorëzuar sipas rregullores.
Pas skadimit të afatit ka reaguar nga Elbasani edhe deputeti Luciano Boçi ku thotë se çështja e Presidentit është një teatër tallës i paralajmëruar nga grupi i Rithemelimit. Sipas tij Rama ka axhendën e vetë dhe në këtë proces nuk ka bërë asgjë tjetër veçse ka tërhequr prej hundësh deputetin Alibeaj. Ndërsa gjykon se negociatat duhet të jenë në nivel politik dhe jo parlamentar garanton se në raundin e tretë Partia Demokratike, duke iu referuar grupit të Rithemelimit do ta shfrytëzojë .
Teksa monitoroi proçesin zgjedhor për kreun e PD-së, deputeti Boçi tha se interesi i demokratëve është i lartë në të gjithë vendin.
“Çështjen e presidentit është diçka e paralajmëruar nga ne, duke parë sjelljen e Ramës në raport me Alibeajn që ishte një teatër. Rama ka agjendën e vet, kërkon të zgjedhë presidentin nga zarfi dhe xhepi i vet, por tërhoqi për hunde zotin Alibeaj për ta paraqitur si proçes konsensual.
Alibeaj kaq kërkon që të konsiderohet drejtues, kaq minimalist është. Nuk është qëllimi të zgjidhet presidenti, qëndron oferta ime që ai të negociojë në nivel politik. Ne nuk heqim dorë nga proçesi, do vazhdojmë me përpjekjet për të negociuar brenda PD-së deri në raund të tretë” – u shpreh Boçi.