Dikur ishin shoqe të ngushta dhe i shihje shpesh herë bashkë në postimet në Instagram. Por sot, Jonida Maliqi dhe Alba Danaj jo vetëm që nuk e ndjekin njëra-tjetrën, por kanë pasur dhe përplasje në distancë.
Së fundi, fashionista Alba ka bërë një postim thumbues për një deklaratë të Jonidës së bërë pak kohë më parë. Ajo ka risjellë një deklaratë të këngëtares të thënë në emisionin “Klanifornia”, ku tregoi një trend të çantave super të vogla që nuk i pëlqen aspak.
“Nuk do të shpenzoja kurrë para për çanta që janë më të vogla se dora ime”, është shprehur Jonida me humor, për sa i përket këtij trendi të cilin e preferojnë shumë vajza shqiptare, nga Lori Hoxha dhe deri te vetë Alba.
Kaq mjaftoi që kjo deklaratë e Jonidës të kthehej personale nga Alba e cila ka shpërthyer me disa akuza në një postim në Instastory.
“Hahaha se në fakt u këpute duke blerë të mëdha. Laj borxhet e atyre që ke mi fasadë dhe pastaj fol e komento për çanta. Mjerë në duart e kujt ka ngelur opinioni për modën”, shkruan Alba.
Kjo nuk është akuza e vetme që ka bërë ajo, pasi muaj më parë pasi u bë nënë për herë të dytë, Alba bëri disa komente të tjera ku e quante Jonidën “fasadë”.
Nuk e dimë se çfarë ka ndodhur mes dy ish-mikeshave, por këto publikime po tërheqin vëmendjen e të gjithëve atyre që i njohin në rrjetet sociale.
Vetë Jonida nuk ka bërë asnjë reagim publik për këto akuza dhe pavarësisht kritikave nga ish-shoqja, ajo vijon të jetë një ndër femrat më të angazhuara me modën në Shqipëri.
Aktualisht Jonida ka marrë përsipër një projekt të rëndësishëm pasi do të ngjisë në sfilatë markat dhe stilistët më të njohur në Shqipëri. Eventi në bashkëpunim me panairin më të madh të bukurisë në Shqipëri, “Beauty Fair Albania”, do të vijë nën emërtimin “Tirana Fashion Days”.