Britania e Madhe është një destinacion shumë i dëshiruar për shqiptarët të cilët duan të emigrojnë jashtë. Deri më sot, shumë shtetas shqiptarë që jetojnë në Angli kanë përdorur metoda nga më të ndryshmet për të shkuar atje, që nga kamioni, gomonet apo forma të tjera te çuditshme e duke arritur madje deri tek avioni privat. Kjo mënyrë e re për të shkelur në tokën britanike është zbuluar së fundmi ku autoritetet kanë konstatuar një rast që shqiptarët po përdorin edhe avionët privatë. Mësohet se ata kalojnë kryesisht nga kalojnë brigjet e Francës për shtetin ishullor me avionë privatë.
Katër shtetas shqiptarë u ndaluan së fundmi nga autoritetet e emigracionit në Britani. Bëhet me dije se akuza është ngritur për pilotin privat, Richard Styles, i cili u akuzua se ka kryer fluturimin e jashtëligjshëm të katër shtetasve shqiptarë drejt vendit ishullor. Mediat britanike raportojnë se fluturimi i jashtëligjshëm është kryer ditën e enjte.
Mes 4 shqiptarëve që u kapën në rrugën drejt Britanisë ishte edhe një 64-vjeçar, ndërkohë që më i riu ishte 21 vjeç si dhe një grua. Styles u kap bashkë me shtetasit shqiptarë, pasi oficerët e Policisë së Northamptonshire, të ndihmuar nga Agjencia Kombëtare e Krimit ndaluan taksinë e tyre teksa po largohej nga fusha ajrore.
“Ne e dimë se kontrabandistët e njerëzve përdorin një sërë metodash për të tentuar të shkelin kontrollet kufitare të Mbretërisë së Bashkuar dhe ne mbetemi aktiv ndaj kërcënimeve. Duke punuar me partnerët tanë të zbatimit të ligjit, ne jemi të vendosur të bëjmë gjithçka që mundemi për t’i ndaluar ata. Aviacioni dhe komuniteti lokal mund të luajnë një rol jetik në parandalimin e krimit në kufi dhe nëse punoni në industrinë e aviacionit, jeni një pilot i mprehtë ose jetoni në vend, duhet të raportoni menjëherë çdo aktivitet të pazakontë ose të dyshimtë në një aeroport në Mbretërinë e Bashkuar”, tha shefi Rajonal i Hetimeve të NCA-së, Jacque Beer.