Faqja zyrtare e Skënderbeut në facebook kishte bërë ironi me ngjarjet e ndodhura në Fushë Krujë për ndeshjen e vlefshme të javës së shkuar në Superiore, Kastrioti-Skënderbeu, ndoshta duke pasur informacion se Komisioni i Disiplinës, i mbledhur ditën e sotme, nuk do të merrte parasysh kërkesën për fitore në tavolinë 0-3 për klubin korçar, që akuzonte se lojtarët e saj ishin sulmuar dhe dhunuar nga tifozë të pranishëm jashtë ambjenteve të stadiumit.
Bardhekuqtë pohuan se respektuan garën sepse të detyruar, por mbarëvajtja e ndeshjes ishte totalisht e gabuar dhe se nuk pati asnjë organizim policor. Por, Disiplina, në bazë të materialeve, ka vendosur vetëm përjashtim për dy ndeshje të stadiumit (do të luajë në fushë asnjanëse) dhe gjobë 50 000 lekë. Sa i përket vlerësimit të infrastrukturës, çështja i referohet Komisionit të Licencimit.
E pëson edhe zyrtari i Kastriotit, presidenti Gazment Vogli, me tetë ndeshje përjashtim nga aktiviteti. Sakaq, gjoba për Tiranën, Flamurtarin dhe Bylisin.
- Vendimi i Komisionit të Disiplinës së FSHF datë 05.02.2019 –
1. KF “Tirana”, për sjellje të gabuar të spektatorëve duke hedhur sende brenda rrethimit të fushës, në bazë të Nenit 66/1 të KDS, dënohet me gjobë në masën 200.000 (dyqindmijë) lek.
2. KS “Kastrioti”, për dështim në përmbushjen e përgjegjësive për organizimin e ndeshjes kundër KF Skëndërbeu duke mos garantuar sigurine e lojtarëve kundërshtarë si dhe sjellje të gabuar të spektatorëve, në bazë të nenit 5/2; 64/c; 65/2 dhe 66/1 të KDS, dënohet me zhvillimin e 2(dy) ndeshjeve në fushë asnjanëse dhe gjobë në masën 50.000 (pesëdhjetëmijë) Lekë. Për vlerësimin e kriterit infrastrukturor çështja t’i referohet Komisionit te Liçesimit.
3. Zyrtari i KS “Kastrioti”, Gazment Vogli, për sjellje të gabuar ndaj zyrtarëve të ndeshjes duke përdorur fjalë fyese, në bazë të Nenit 49/2/a) të KDS dënohet me 8 (tetë) ndeshje pezullim nga aktivitetet futbollistike. Në bazë të nenit 20 të KDS, zyrtarit i ndalohet qëndrimin në dhomat e zhveshjes, stoli i rezervave dhe territori përreth fushës.
4. FC “Flamurtari”, për sjellje të gabuar të spektatoreve, në bazë të Nenit 66/1 të KDS, dënohet me gjobë në masën 100.000 (njëqindmijë) lek.
5. Zyrtari i KF “Egnatia”, Agron Alia, për protestë ndaj vendimeve të zyrtarit të ndeshjes, në bazë të Nenit 56/1/a) të KDS, dënohet me 2 (dy) ndeshje pezullim nga aktiviteti.
6. KF “Bylis”, për sjellje të gabuar të spektatorëve, në bazë të Nenit 66/1 të KDS, dënohet me gjobë në masën 100.000 (njëqindmijë) lek. Në aplikim te Nenit 136/1.a të KDS, gjoba shlyhet në masën 50%.
7. Lojtari i KF “Burreli” U -17, Samuel Kola, për sjellje jo sportive ndaj zyrtarit të ndeshjes, në bazë të Nenit 49/1/a të KDS, dënohet me 6 (gjashtë) ndeshje pezullim nga aktiviteti.
8. Zyrtari i KF “Brians” U-17, Kreshnik Ivanaj për protestë ndaj vendimeve të zyrtarit të ndeshjes, në bazë të Nenit 56/1/a) të KDS, dënohet me 2 (dy) ndeshje pezullim nga aktiviteti.
9. Rrëzimin e kërkesës së lojtarit të KF “Shkëndija DR” U-19, Etnik Kameri, si të pa bazuar në KDS dhe Rregulloret e tjera të FSHF.
10. Rrëzimin e kërkesës së lojtarit të KF “Kukësi” U-17, Ervis Patarria, si të pa bazuar në KDS dhe Rregulloret e tjera të FSHF.