Kryeministri i Izraelit, Naftali Bennett ka zhvilluar biseda të ndara telefonik me Presidentin e Ukrainës, Volodymyr Zelensky dhe atë rus Vladimir Putin.
Në një postim në Twitter, Zelensky tha se ai falënderoi Bennett “për përpjekjet ndërmjetësuese të Izraelit. Diskutuan mënyrat për t’i dhënë fund luftës dhe dhunës.”
Ndërkohë Kremlini në një deklaratë ka thënë se dy liderët kanë diskutuar për aspekte të ndryshme të situatës.
“Vladimir Putin ndau vlerësimin e tij për raundin e tretë të bisedimeve midis delegacionit rus dhe përfaqësuesve nga Ukraina të mbajtur më 7 mars në Bjellorusi”, ka thënë Kremlini.
Ndërkohë vetë Izraeli nuk ka bërë asnjë deklaratë në lidhje me detajet e bisedave.
Raundi i fundit i bisedave vjen tre ditë pasi Bennett bëri një udhëtim të papritur në Moskë të shtunën, ku ai kaloi tre orë me Putinin. Bennett tha të nesërmen se Izraeli do të vazhdojë të ndihmojë ndërmjetësimin “edhe nëse shansi nuk është i madh”.