Sot ndryshe nga vitet e tjera Dita Ndërkombëtare e Sporteve Ushtarake, na gjen në një situatë të vështirë. Megjithëse në këto kohë me masa kufizuese shumë kanë hequr dorë nga sportet, këtë nuk e kanë bërë efektivët e Forcave të Armatosura.
Ministri i Mbrojtjes, Niko Peleshi nëpërmjet një video me moton “Kampionët nuk ndalen” të postuar në rrjetet sociale ka dhënë mesazhin se efektivët e FA janë gjithmonë gati të përballojnë çdo sfidë, sado e vështirë të jetë ajo!
Me zhvillimin e sporteve ushtarake që mbulojnë disa disiplina, Forcat e Armatosura japin një kontribut të madh për ecurinë e sportit dhe kulturës sportive.
Më datë 18 shkurt që është edhe dita e CISM-it zhvillohet çdo vit një maratonë vrapi nga vendet anëtarë të kësaj organizate duke u kthyer në ditën ku ushtarakë dhe civilë vrapojnë së bashku në gjithë botën nën flamurin e sportit dhe paqes.
Në CISM (International Military Sport Council) Këshillin Ndërkombëtar të Sporteve marrin pjesë 136 vende pjesëmarrëse, midis tyre edhe Shqipëria.