Denion Fiku 20-vjeçari që u arrestua sot nga policia, pasi u kap me armë kallashnikov, një armë gjahu shotgun dhe një sasi fishekësh, është djali i kryetarit të Partisë Demokratike dega Bulqizë, Dëfrim Fiku.
Sipas policisë i riu po qarkullonte në automjet me dy shokë të tij nga Tirana, ndërsa gjatë kontrollit iu gjetën një armë zjarri automatik, një armë gjahu shotgun dhe 30 fishekë. Po ashtu mësohet se i riu rezulton se është dhe militant i Partisë Demokratike. Pas vëzhgimit në rrjetet sociale, i riu shihet se ka postuar foto nga koha kur PD mbante protesta përballë Kryeministrisë në ‘Çadrën e Lirisë’.
Madje Fiku ka bërë dhe një foto me liderin e PD-së, Lulzim Basha. Ndaj personit të arrestuar rëndon akuza për veprat penale “Mbajtja pa leje e armëve luftarake” dhe “Mbajtja pa leje e armëve të gjuetisë”. Ndërkohë që dy shokët e tij Saimir Hallaçi, 24 vjeç dhe Andi Çuni, 25 vjeç, akuzohen për veprën penale “Moskallëzimi i krimit”.
