Në një takim me banorët e Vaut të Dejës, ish-kryeministri u ndal gjatë bashkëbisedimit te lirimi nga burgu i ish-deputetit socialist, Alqi Bllako, pas prangosjes nga SPAK si i përfshirë në aferën e inceneratorëve.
Sipas Berishës, për lirimin e ish-deputetit ka pasur ndërhyrje të fortë politike pasi ai kërcënoi qeverinë Rama se do të fliste dhe do të zbërthente aferën e djegësave të plehrave.
“Si mundet një shtet që ka lëshuar urdhër arreste për Zoton, Gugallen dhe Mërtirin, atyre u disbursohen milionat e eurove. Në fakt ato u disbursohen Edi Ramës, Ëngjëll Agaçit, Arben Ahmetajt dhe Erion Veliajt. E patë hetimin që u bë me deputetin. Ishte i rëndësishëm ai mbante postin e Sekretarit të Përgjithshëm në Ministrinë e Mjedisit. E morën deputetin e vunë në hetim për një çështje çmimi trualli dhe tani e liruan e çuan në shtëpi. Se i tha ai o më lironi o do flas. Ka ndërhyrje të fortë politike për ndërhyrjen e tij. Prandaj paratë nuk dalin për të subvencionuar ju. Pse qeverisë së Kosovës i dalin paratë për t’u dhënë pensionistëve dhe studentëve 100 euro dhe të dyfishojë ndihmën ekonomike. Kosova më e pasur se ne e ka më të vogël buxhetin. Problemi është se aty nuk vjedh qeveria këtu te ne vjedh. Qeveria kthen në mallkim për qytetarët të gjitha pasuritë publike”, tha Berisha.