Kryeministri i vendit dhe kryetari i Partisë Socialiste, Edi Rama bëri me dije se Kongresi i radhës i kësaj partie do të mbahet në vjeshtë. Rama tha se ai do të jetë në formë llogaridhënës për ato ç’ka u thanë Kongresin e sotëm.
Gjithashtu, kreu i qeverisë theksoi se do të ngihet një mekanizëm i ri, me anë të të cilit të gjithë anëtarët e partisë, do të japin opinionin e tyre në një letër sekrete lidhur me funksionimin e institucioneve vendore dhe qëndrore.
“Së pari mendoj se është e udhës që në vjeshtë tjetër Kongres që t’i përkushtohet llogaridhënies lidhur me çka thamë sot, lidhur me një periudhë që do jetë sfiduese dhe provë për të gjithë. Po njëkohësisht duhet të ndërtojmë një mekanizëm të marrjes së opinionit të gjithë anëtarësisë për institucionet vendore dhe qëndrore në territor, marrje mendimi me shkrim. E gjithë partia do ftohet të japë opinionin e vet me një fletë sekrete për gjithë drejtuesit dhe performancën e institucioneve në territor. Partia duhet të jetë syri që ndjek në emër të zgjedhjeve të saj realizmin e programit. Këtë gjë ta kthejmë në rregull, nuk mundet dot që të zgjedhurit të jenë të mbrojtur nga një gardh bashkëpunëtoresh të afërmish që janë dhe anëtar këshillash etj, ndërkohë që pjesa tjetër që janë atje sa herë që është nevoja për të kërkuar vota, për të mbrojtur rezultatin në komisione mbeten jashtë”, deklaroi Rama.