Rudina Hajdari është përmendur shpesh në media për lapsuset gjatë fjalimeve të saj, ku e fundit ishte ajo në Parlament se “do vijojë të përçajë shqiptarët”.
Por ndryshe nga herët e tjera, Rudina këtë herë ka vendosur të reagojë ndaj kritikave.
“Kam kaluar 17 vite në Amerikë dhe ky është fakt. Po më mirë lapsuset e mia se sa t’i gënjej demokratët çdo ditë duke ju thënë që mos të kalojnë në eufori se 85% e shqiptarëve thonë “Rama ik” & “Basha & Kryemadhi hajde”. Ndërkohë i kanë lënë pa punë e pa bukë për hesapet e tyre.” shkruan Hajdari.
Por duket se kryetarja e grupit parlamentar demokrat nuk e ka lënë me kaq. Në një postim të dytë Hajdari ka thënë se anglishten e flet shumë mirë dhe se këtë kanë frikë kundërshtarët e saj, kur ajo ulet me ndërkombëtarët.
“Po atë anglishten e di si e flas ama kur vjen puna të ulem me Amerikanët, Gjermanët, etj, aq mirë sa e bëjnë dallimin e nuk merren më me gënjeshtrat e këtyre. Prandaj kanë frikë këta kur ulem unë me ndërkombëtarët dhe sulmojnë nga mëngjesi në darkë duke u kapur me gjëra banale”, thekson ajo.
Gjatë seancës së parë plenare, Rudina Hajdari ka bërë një lapsus gjatë leximit të fjalimit të saj, por këtë e ka justifikuar me faktin se ka jetuar 17 vite në Amerikë.
“Ne do vijojmë që të përçajmë të gjithë Shqipërinë. Ne do shkojmë në çdo qytetet për të njohur vendin me alternativen demokrate. Ne do të fillojmë udhëtimin tonë, qytet më qytet, fshat më fshat. Ne nuk ndalemi nga beteja për të sjellë demokracinë në vend”, tha Hajdari në seancë plenare.