Kryetarja e Bashkisë së Shkodrës, Voltana Ademi thotë se do të kishte dëshirë të qëllonte me molotov gjatë protestave, por se nuk dinte t’i përdorte.
E ftuar në një emision televiziv lokal, Kryebashkiakja e qytetit verior thotë se në protestë duhet dhënë gjithçka.
“Sigurisht që unë shkoj në Tiranë dhe shkoj dhe protestoj fort. Po të kisha edhe unë molotov edhe unë do të gjuaja me molotov. Pra, që do të thotë, unë nuk di të gjuaj me molotov, pavarësisht se në shkollë kena ba dhe ushtarake por na qëlloi që të ndryshonim sistemin, shyqyr Zotit, edhe nuk e kam pasur këtë mundësi. Por, qejfi dhe dëshira…kur je aty në protestë do me dhënë gjithçka nga vetja. Do të kisha dëshirë të gjuaja edhe unë me molotov”, shprehet Ademi.
Pasi publikimit të lajmit nëpër media, Ademi ka reaguar duke theksuar se fjalët e saj janë nxjerrë nga konteksti.
Në një postim në facebook, Ademi shkruan se fjala moltov është përdorur në mënyrë figurative, ndërsa shton se Shkodra dhe shkodranët, sipas saj kanë patur mijëra arsye për të përdorur “molotov”.
Postimi i plotë:
“Molotov” ka shqetesuar deri në trembje shumëkënd! E artikuluar mjaft qartë nga unë në një intervistë televizive, kanë tentuar e po te tentojnë ta nxjerrin nga konteksti. Në fakt, këto katër vite por edhe më herët, Shkodra dhe shkodranët kanë patur mijëra arsye për të përdorur “molotov”. U anashkaluan deri në harresë të plotë nga kjo qeveri, u burgosën, u dhunuan, iu hoq ndihma ekonomike, iu hoq buka e gojës, i pushtoi e i dhunoi kriminaliteti e pushteti i kriminelëve.
E sot po i kërkohet të mbyllin sy e veshë, kur po u rrembehet ajo që e fituan me mund e sakrifica, madje edhe duke sakrifikuar jetën: Demokracia, e drejta për të zgjedhur! E drejta per të jetuar e punuar të lirë! E drejta për të qenë të sigurtë e për të gëzuar vendin e vet!
E po e artikuloj edhe një herë:
“… me “molotov” për të bërë shumë zhurmë! Shumë zhurmë! “. Ashtu siç kanë ushtuar e ushtojnë sheshet e kryeqyteteve perendimore në Itali, Francë, Greqi etj.
Fjalën time duhet ta kishit transmetuar të plotë e jo gjysma- gjysma! E keni të postuar të gjithën, prej kater ditësh, në faqen time Facebook!
Protesta, figurativisht edhe me “molotov” është një mënyrë për t’u mbrojtur nga ata që po na vrasin! Është mënyrë për të bërë zhurmë për t’u dëgjuar!
Po prap do të protestojmë, me tërë fuqinë! Për të mbledhur të tjerë e sa më shumë!
E figurativisht me “molotov” , për të zhurmuar për dyert e mbyllura të institucioneve, dhe burgun që Edi Rama po i ndërton përditë njerëzve të thjeshtë, e qe po i vret përditë!
Kemi prekur fundin! Nga zhurma duhet të shqetësohen ata që kanë frikë! Dhe me të vertetë duhet të kenë frikë! Nga njerëzit e thjeshtë dhe nga e keqja që kanë mbjellur!