Thellohet më tej skandali i dy vëllezërve indianë që janë shpallur në kërkim ndërkombëtar për mashtrim. Bëhet fjalë për procedurën e ndjekur nga autoritetet shtetërore shqiptare për dhënien e pëlqimit që njëri nga dy vëllezërit, Nitin Jayantilal Sandesara të bëhej “konsull nderi” i Shqipërisë në Nigeri.
Sipas gazetës “Panorama“, ministria e Jashtme shqiptare i ka kërkuar me shkresë zyrtare Shërbimit Informativ Shtetëror, si i vetmi organ që heton dhe verifikon pastërtinë e figurës, pasi kishte shqyrtuar kërkesën në bazë të informacioneve që dispononte, dhe kishte dhënë pëlqimin për Sandesara që të bëhej “konsull nderi” i Shqipërisë.
Në kthimin e përgjigjes së SHISH thuhet se “Në përgjigje të shkresës suaj nr. 17437, datë 13.11.2018, pas verifikimeve të kryera ju bëjmë me dije se Shërbimi Informativ i Shtetit është i mendimit që të jepet pëlqimi për emërimin e z. Nitin Sandersara si “Konsull Nderi” i vendit tonë në Nigeri. Ju falenderojmë për mirëkuptimin dhe bashkëpunimin”.
SHISH nuk kishte konstatuar asnjë problematikë në verifikimin e indianit i cili kishte mashtruar bankat shteëtrore indiane duke marrë para kredi që kapnin vlerën deri në 1 miliardë dollarë amerikanë.
“Panorama bën të ditur gjithashtu se indiani i cili kishte marrë dhe shtetësinë shqiptare Nitin Sandesara nuk u pajis nga ministria e jashtme shqiptare me pasaportë diplomatike.
Pas përgjigjes zyrtare nga SHISH, kërkohet informacion nga Nigeria në cilësinë e vendit propozues dhe pritës. Pavarësisht se kërkesa është nisur prej vetë atyre, sërish janë kërkuar informacione shtesë.
Dhe kjo duket në shkresat që disponon gazeta “Panorama”, ku MPJ e Nigerisë i kërkon asaj shqiptare që Sandesara të bëhej konsull i tillë. Madje në këtë kërkesë është dhe një shkresë e policisë nigeriane që thekson se indiani është person i pastër.
Lexo edhe: Historia e dy vëllezërve indianë dhe ndërtimet në Shqipëri