Nënkryetari i PD-së Edmond Spaho në një deklaratë për mediat foli për rritjen e cmimit të naftës me 2 lekë për litër.
Spaho deklaroi se kryeministri Edi Rama dhe ministrja e Financave Anila Denaj i gënjyen shqiptarët për çmimin e naftës, por sipas tij ministrja e Infrastrukturës dhe Energjisë Belinda Balluku i nxori në shesh gënjeshtrën.
‘Edi Rama dhe ministrja e tij e Financave gënjyen paturpësisht kur thanë se nuk ka rritje të re të çmimit të karburanteve. Ministrja e Energjisë Belinda Balluku e nxjerr në shesh këtë gënjeshtër të Edi Ramës me shpjegimet ligjore që ka çuar në Kuvend. Në fund të shpjegimit të ligjit që rrit çmimin e karburanteve thuhet qartë se kostot mund të ndikojnë në çmimin e konsumatorit fundor. Ky është dokumenti ku ministrja sqaron se këto kosto mund të ndikojnë në çmimin e konsumatorit fundor si dhe thekson që në këtë fazë është e pamundur të llogaritet tarifa e mbajtjes dhe menaxhimit të rezervës së sigurisë’, tha Spaho, ndërkohë që pretendon se Shqipëria është vendi me karburantin më të shtrenjtë në botë.
‘Shqipëria është vendi me karburantin më të shtrenjët në Evropë, pasi Edi Rama vendosi dy vjet më parë taksën e qarkullimit 270 lekë për litër. Kjo ndërhyrje e re për të rritur sërish çmimin është goditje direkte për qytetarët, 31% e të cilëve nuk mbyllin dot muajin. Ky është një nga ata vendime për të cilin Departamenti Amerikan i Shtetit (DASH) e cilësoi Shqipërinë si vendi më i korruptuar në ballkan’, theksoi nënkryetari i PD.