Ardi Behari nuk do të jetë më drejtor i Flamurtarit, bëjën të ditur burime për Panorama Sport. Sipas saj, ai ka dhënë dorëheqjen e parevokueshme nga detyra që mbante.
Drejtori më jetëgjatë në historinë e kuqezinjve, por edhe më i plotfuqishmi në vendimet e klubit, i ka paraqitur kërkesën për largim administratorit. Gazeta zbulon se motivacioni i dorëheqjes së tij nga detyra e drejtorit të klubit është për arsye personale dhe familjare. Sinan Idrizi e ka pranuar dorëheqjen e Beharit dhe pritet që në ditët në vazhdim të dalë përkrahë tij në një konferencë për shtyp, për ta falënderuar për bashkëpunimin e deritanishëm. Të paktën kjo konfirmohet nga burimet konfidenciale pranë klubit.
Ardi Behari ka zhvilluar një takim kokë më kokë me administratorin, të cilit i ka paraqitur edhe vendimin për t’u larguar. Duke qenë se ai ka qenë bashkëpunëtori më i afërt dhe një nga njerëzit më të besuar të Idrizit, ky i fundit fillimisht ka nguruar për ti pranuar dorëheqjen nga posti i drejtorit të klubit. Por, duket se arsyet e ka bindur kreun i klubit që të firmoste “divorcin”./ Panorama Sport