Vijon gjykimi i të pandehurve në gjykatë për dosjen 5D. Avokatja e Taulant Tushës ka kërkuar ndarjen e procedimit penal për klientin e saj, duke argumentuar se pozita e tij juridike, faktet dhe provat që lidhen me të janë të ndryshme nga ato të të pandehurve të tjerë.
Kërkesës së saj iu bashkuan edhe të pandehurit Enton Punavija, Julian Zanaj dhe Albano Janku – anëtarë të Komisionit të Vlerësimit të Ofertave – të cilët kërkuan gjithashtu gjykim të veçuar, duke theksuar se çështjet ndaj tyre nuk kanë lidhje të drejtpërdrejtë me pjesën tjetër të dosjes.
Sipas mbrojtjes, veprat penale që u atribuohen Mariglen Qatos dhe Redi Mollës – përkatësisht korrupsion pasiv, pastrim parash dhe fshehje pasurie – si edhe akuzat ndaj Nestor Muhametllarit, janë të një natyre të ndryshme dhe kërkojnë një trajtim më të thelluar për shkak të kompleksitetit të provave.
Pavarësisht këtyre pretendimeve, Gjykata e Posaçme kundër Korrupsionit dhe Krimit të Organizuar vendosi të mos e pranojë kërkesën për ndarje të çështjes. Trupa gjykuese argumentoi se çështja do të vijojë të shqyrtohet në një proces të unifikuar për të gjithë të pandehurit.