Ish-drejtori i ALUIZNI-t në Durrës, Flamur Gjuzi, ka fituar këtë të hënë pafajësinë në gjykatë, ku po gjykohej për “shpërdorim detyre” si pjesë e dosjes së tërmetit të vitit 2019. I pafajshëm është shpallur edhe Artur Terziu, pronari i një lokali në Durrës ku humbën jetën dy persona si pasojë e dëmeve të tërmetit.
Në dosjen e prokurorisë pronari i lokalit akuzohej se kishte ndërhyrë në katin e parë në kundërshtim me rregullat. Nga hetimet e prokurorisë së Durrësit ka rezultuar se 44-vjeçari ka dobësuar muret dhe bazamentin mbajtës të pallatit, me qëllim përfitimin e hapësirave të mjaftueshme për lokalin e tij. Sipas dosjes së prokurorisë, Terziu ka shfrytëzuar edhe tarracën e pallatit ku ndodhej lokali, ku kishte vendosur tri depozita uji voluminoze në funksion të biznesit.
I pafajshëm është shpallur edhe kreu i Inspektoratit të Mbrojtjes së Territorit, Artur Çela. Tre ish-punonjës të të njëjtit institucion janë shpallur fajtor. Skerdi Bello është dënuar me 2 vite shërbim prove, Alfred Qetka 6 vite në shërbim të komuniteti, po ashtu edhe Aldo Dakovelli.