Gjykata ka dhënë masën burg për jetë për autorin e vrasjes së Suela Sulës, Fatjon Karmneshta, ngjarje e ndodhur në prill të 2016-tës. Në burg është dhe bashkëshorti i Suelës, si porositësi i vrasjes.
Në dosjen hetimore të vrasjes së Suela Sulës, në prill të 2016-tës shpjegohet dhe se si organet hetimore arritën tek ekzekutori i 38-vjeçares, duke zbuluar edhe porositësin e vrasjes, që ishte pikërisht bashkëshorti i saj.
Nga këqyrja e telefonit të viktimës u përftuan disa regjistrime audio, ku Sadetini bashkëbisedonte edhe me një person të quajtur Fatjon Karmeshtna, me të cilin rezulton se kishte një raport të ngushtë dhe bisedojnë për raportet e të pandehurit me bashkëshorten dhe dyshimet e tij rreth saj.
Gjatë hetimeve paraprake prokuroria kishte marrë në pyetje Fatjonin por ai kishte dhënë deklarime të rreme. Prokuroria dyshonte se ishte ai ekzekutori material i krimit dhe e mori në pyetje. Atëherë për të provuar faktin u kryen hetime më të thelluara në rrugë operative.
Në kërkesën e urdhrit të ndalimit të prokurorit të Krimeve të Rënda Henrik Ligori thuhet: “Me anën e një shisheje uji që e përdori i dyshuari, me urdhër të prokurorit, u tentua të merrej material biologjik për të ndërtuar profilin gjenetik të AND-së së këtij shtetasi dhe për të kryer në vijim krahasimet e nevojshme.”
Ekpertimi biologjik i ADN-së u krye më 8 janar 2018.
Kjo profil gjenetik u krahasua profilin gjenetik të mbetjeve biologjike të marra nga thonjtë e dorës së djathtë të viktimës Suela Sula dhe ekspertët vërejtën përputhje të plotë.
Më 19 janar 2018 ekspertët arritën në konkludimin se: “Profili gjenetik i përftuar nga materiali human në grykën e shishes e cila është përdorur nga shtetasi Fatjon Karmeshtna, ekzaminuar me aktin Nr.141, datë 08.01.2018, është plotësisht i përfshirë në profilin miks të përftuar nga thonjtë e dorës së djathtë të kufomës së shtetases Suela Sula, ekzaminuar me aktin Nr.4619 datë 24.5.2016.”
“Ky konkluzion provon se viktima është përpjekur t’i rezistojë tentativës së të dyshuarit Fatjon Karmeshtna për ta mbytur dhe gjatë kontaktit fizik materiali biologjik i këtij të fundit ka mbetur i fiksuar në thonjtë e dorës së djathtë të viktimës”
“Në këto rrethana, ka të dhëna të mjaftueshme se ekzekutori material i krimit të vrasjes me mbytje të viktimës Suela Sula është i dyshuari Fatjon Karmeshtna. “
Me bindjen se Fatjoni “kreu krimin në bashkëpunim dhe me porosi të të pandehurit Sadetin Fadil Sula” prokuroria kërkoi arrestimin e tij. Ai u arrestua në janar të 2018, pothuajse dy vite nga ngjarja e rëndë që i mori jetën nënës së tre fëmijëve.