Kryeministri Edi Rama po zhvillon një konferencë të jashtëzakonshme me gazetaret për situatën në veriun e Kosovës. “E kam ditur që nyja gordiane e dialogut do ishte asociacioni dhe bindja ime është se asnjëra nga palët nuk e do asocionin dhe do bëjë çmos ta shtyjë atë në pafundësi”,-tha Rama. Kreu i qeverisë ka bërë me dije se ka përgatitur një draft për Asociacionin e komunave serbe, dhe që është punuar nga ekspertë amerikanë. Rama tha edhe se drafti i është dërguar presidentit francez Marcron dhe kancelarit gjerman Shcolz.
Ai bëri me dije se një ditë më parë i ka përcjellë Presidentit Macron dhe Kancelarit Scholz një draft për Asociacionin e komunave serbe për të cilin ka vënë në dijeni dhe Presidentin e KE-së dhe palën amerikane.
“Është një draft i punuar nga ekspertë të nivelit më të lartë amerikanë dhe europianë prej kohësh gjë që është bërë pikërisht në rast se do të vinte kjo ditë. Kjo ditë kur palët dhe në këtë rast për mua i pakuptueshëm është pozicioni i Kosovës jo i Serbisë, palët nuk po merren dot vesh se kush do ta shkruajë këtë tekst”, deklaroi Rama.
Ai tha se “ky është një dokument konfidencial i cili padiskutim nuk pretendon të jetë zgjidhja ideale por ju siguroj që është një dokument i i nivelit më të lartë ndërkombëtar që merr në konsideratë të gjitha arsyet për krijimin e asociacionit dhe patjetër se asociacioni është pjesë e organizimit të jetë në Republikën e Kosovës”.
“Uroj dhe shpresoj që ky material të vlejë për të çuar në një tjetër nivel dialogun dhe t’i bëjë palët që të flasin për gjëra konkrete dhe jo që të flasin me vete dhe për vete. Arsyeja pse e ndaj sot është sepse situata po bëhet alarmante dhe unë nuk mund të qëndroj spektator duke parë Kosovën si tkurret në sytë e atyre që e krijuan shtetin e Kosovës”, nënvizoi Rama.