Analisti dhe gazetari Agim Baçi teksa analizon draftin e ri të Kodit Penal, thotë se disa prej ndryshimeve të propozuara, veçanërisht ato që lidhen me lirinë e shprehjes, përbëjnë rrezik për demokracinë dhe bien ndesh me Kushtetutën.
”Do të komentoj pjesën e cenimit të lirisë së shprehjes në Kodin e ri Penal. Mendoj se është antikushtetuese dhe e rrezikshme”, tha Baçi duke theksuar se qeveria duhet të jetë e hapur ndaj kritikës, pasi përfaqëson qytetarët dhe është në shërbim të tyre.
Për të liria e shprehjes është një nga parimet themelore të demokracisë dhe nuk mund të kufizohet me ligje që ndëshkojnë mendimin apo ironinë qytetare. ”Ndoshta nuk e kanë kuptuar që një nga gjërat më thelbësore në demokraci është edhe t’ia fusësh kot. Nuk do të thotë që ai qytetari ka të drejtë gjithnjë, por humori apo sarkazma e tyre është një mënyrë e përballjes së tyre me qeverisjen”.
Baçi shtoi gjithashtu se disa nga nenet e përfshira në draft janë refuzuar më parë edhe nga vetë Bashkimi Europian dhe u bëri thirrje qytetarëve dhe shoqërisë civile që të kundërshtojnë çdo tentativë për të kufizuar fjalën e lirë, duke theksuar se shpifja duhet të ndëshkohet, por jo në dëm të lirisë së shprehjes.