Alfred PEZA
Ish udhëheqësi i serbëve të Bosnjës, Radovan Karaxhiç, u
dënua më burgim të përjetshëm. Dhoma e Apelit e Mekanizmit që trashëgoi
Gjykatën për Krime Luftë në Hapësirat e ish Jugosllavisë, hodhi poshtë ankesat
e tij. Ai u shpall fajtor për gjenocid, krime kundër njerëzimit dhe shkelje të
zakoneve të luftës.
Gjykata e shpalli fajtor për gjenocid për masakrën e Srebrenicës, që synonte
vrasjen e “të gjithë burrave të aftë për luftë” dhe shfarosjen e
komunitetit mysliman boshnjak në atë zonë në korrik të vitit 1995, pasi forcat
serbe e morën nën kontroll qytetin që ishte shpallur “zonë e sigurt”
nga OKB.
Radovan Karaxhiç, sot 73 vjeç, u arrestua në korrik 2008 në Beograd, pas 11
vjet arratisjeje. I vetmi zyrtar më i lartë që është përballur me Gjykatën e
Hagës për krime lufte, ishte ish presidenti i Serbisë, Sllobodan Millosheviç,
cili vdiq në Hagë në vitin 2006, para se të përmbyllej gjykimi kundër tij për
krime lufte e gjenocid ne Bosnjë, Kroaci dhe Kosovë.
Ratko Mladiç, gjenerali që komandonte forcat e serbëve të Bosnjës, u dënua ne
vitin 2017 me burgim të përjetshëm nën akuzat për gjenocid, krime lufte dhe
krime kundër njerëzimit, në lidhje me vrasjen e mbi 8 mijë burrave në korrik të
vitit 1995 në Srebrenicë.