Drejtësia shqiptare dhe ndërkombëtare kanë qenë dy fjalët e përmendura herë pas here të kreut të shtetit Ilir Meta gjatë komunikimit me gazetarët pasi dorëzoi në Gjykatën Kushtetuese kërkesën për shpalljen antikushtetues të ligjit për teatrin.
“Kam ardhur sot këtu për të garantuar që Republika e Shqipërisë do të jetë në sundimin e ligjit dhe të popullit, boll me sundimin e oligarkëve dhe dua t’i siguroj të gjithë se është e domosdoshme të ndërpritet ekzekutimi i këtij akti kriminal të sotëm, në konfliktin me aktorët, regjisorët dhe komunitetin dhe do të veprojë drejtësia shqiptare dhe ndërkombëtare ndaj punonjësve lokalë dhe ndërkombëtar që e kanë lënë vendin pa Gjykatë Kushtetuese”, tha kreu i shtetit, duke theksuar se ishte Ramaforma që la vendin pa Kushtetuese.
Sot shënohet dhe dy vjetori i betimit të tij si President mbi Kushtetutë dhe Meta tha: “Dy vjet që jam betuar në Kushtetutën e Republikës së Shqipërisë. Unë kam bindjen që drejtësia shqiptare dhe ndërkombëtare janë në veprim dhe do të jetë në veprim pavarësisht nga të gjitha pengesat që ndeshen”, tha ai.