Përveç ndeshjes me Valmierën, Partizani vijon me të njëjtin ritëm edhe përgatitjet për ndeshjen e së shtunës ndaj skuadrës së Romës, në një nga miqësoret më prestigjioze që janë luajtur në vitet e fundit në vendin tonë.
Sfida e 12 gushtit në “Air Albania” pritet të ketë një prani të madhe të spektatorëve, me tifozët që janë paraqitur të shumtë për të siguruar një biletë për sfidën e së shtunës.
Klubi ka vendosur të caktojë çmime të ulëta për këtë sfidë, ku një biletë në tribunën përballë kushton 600 lekë, ndërsa në ato pas portave 400 lekë. Deri ditën e djeshme për këtë sfidë janë shitur përafërsisht 7 mijë bileta, teksa sot dhe në vijim pritet që ritmi të rritet. Ndërkohë, mësohet se kjo sfidë do të transmetohet në kanalet e “RTSH”-së.
Në lidhje me ndeshjen e së shtunës për “RTSH Sport” ka folur drejtoresha e marketingut, Blerina Bajko.
Ajo shprehet se këtë miqësore e ka dashur Murinjo, por edhe kreu i qeverisë dhe ai i bashkisë së Tiranës.
“Kjo miqësore është dashur nga trajneri Murinjo, që ka mbetur i kënaqur nga mikpritja e finales me Fejnordin në vitin e shkuar. Kjo nuk do të jetë vetëm një miqësore, por një festë sportive.
Kjo ndeshje është dashur nga kryeministri Rama dhe është mbështetur nga kryetari i bashkisë, Erion Veliaj. Partizani është i aftë të organizojë të tilla evente”, tha mes të tjerash Bajko.