Drejtori i përgjithshëm i Partizanit, Olsi Rama, ishte natyrisht i kënaqur pas fitores së të kuqve në Korçë, ndaj një rivali të egër dhe mjaft të vështirë, por gjithsesi ruan qetësinë e tij karakteristike dhe nuk fluturon. Ndërkaq, duke folur për “Gol pas goli” në Supersport, Rama lavdëroi në mënyrë të veçantë mbrojtësin Lum Rexhepi, i shkëlqyer në debutimin në Superiore.
Fitorja: “I kënaqur për fitoren, në Korçë ka gjithnjë bukurinë e vet”.
Renditja: “Gjithnjë kam thënë që nuk i shoh ekipet e tjera, do i shoh ndoshta vetëm në 2-3 javët e fundit. Tani lufta jonë është të përmirësohemi vetë, duke parë ndeshjen e radhës”.
Ndryshimet: “Kam parë seriozitet, dëshirë për fitore dhe vetëdije që jemi ekip i mirë. Shënimi i golit që në fillim na ndihmoi, duke pritur kundërshtarin për ta goditur me kundërsulme që i realizuam, por nuk patëm fat të shënonim”.
Dilaver Duka: “Do luajë kur ta meritojë. Duka ka probleme të vogla fizike, për dy javë besoj do jetë gati”.
Surpriza Rexhepi: “Shumë i kënaqur prej tij, tregoi karakter e cilësi, një prurje shumë e mirë për ne”.