Drejtori teknik i skuadrës së futbollit të Burrelit Klevis Gjoka thotë se matjanët gjatë sezonit të fundit performuan mjaft mirë dhe u bënë të gjitha përpjekjet për ta ngjitur ekipin një kategori më lart. Ai nuk do të përsërisë akuzat që janë bërë gjatë sezonit, por shprehet se tani kanë nisur përgatitjet për kampionatin e ri.
“Unë, shprehet Gjoka, mendoj se skema e re e Kategorisë së Parë do ta bëjë kampionatin më të fortë, më të luftuar, më cilësor, më burrëror. Kjo mënyrë e re organizmi do të pakësojë me siguri edhe gabimet apo marifetet që klube të caktuara kanë bërë mes tyre në momente deçisive, gjatë kampionateve të kaluara.”
Ai thekson se në klub do të ketë një analizë e thellë për arritjet dhe të metat që janë konstatuar gjatë sezonit 2020-2021.
“Do të ndalemi në punën e sejcilit lojtar, trajner apo stafit tjetër të klubit. Vetëm mbi këto baza ne do të nënshkruajmë kontratat e reja me futbollistët e sezonit të fundit. Me siguri do të kërkojmë lojtar të rinj cilësorë. Pas takimit që do të kemi me kryetarin e bashkisë do të vendosim për ecurinë e futbollit, do të përcaktojmë objektiva konkrete”, sqaroi Klevis Gjoka.