Policia serbe ka arrestuar një person i cili e ka kërcënuar gazetaren Zana Cimili, gjatë ditës së enjte.
Personi u arrestua nën akuzën për tentim të kryerjes së krimit, përcaktuar si “shpërndarje e urrejtjes fetare e kombëtare dhe cenim të sigurisë”.
Personi i cili e kishte kërcënuar atë në rrjete sociale, i kishte thënë se “është dëshirë jetësore që ta vras një shqiptar, madje edhe një fëmijë shqiptar” duke shtuar se shpreson “për një luftë të re në Kosovë gjatë së cilës shqiptarët do ta ndjejnë zemërimin serb”.
Shoqata e Gazetarëve të Kosovës, e kishte marrë me shqetësim njoftimin e korrespondentes së televizionit rajonal N1 në Kosovë, dhe kishte reaguar për këtë. Aktin e kanë dënuar edhe televizioni N1 dhe Shoqata e Gazetarëve të Serbisë.
Madje për këtë rast reagoi edhe kryeministrja e Serbisë, Ana Bërnabiç, e cila u shpreh se “kërcënimet ndaj gazetares së N1, Zana Cimili, janë të papranueshme dhe meritojnë të dënohen. Është e vështirë të mendohet se dikush në shekullin e 21, mund të kërcënojë dikë në këtë mënyrë”.