Përfaqësuesit e PD-së vazhdojnë të këmbëngulin se është përgatitur arrestimi i kryetarit të Bashkisë Durrës, njëkohësisht antar i Kryesisë së PSSH-së. Deputetja e Partisë Demokratike Grida Duma, komenton deklaratën e Lulzim Bashës, i cili tha se pritet arrestimi i kryebashkiakut socialist të Durrësit, Vangjush Dako.
Sipas Grida Dumës, nëse ka një të vërtetë në deklaratën e Bashës, është konfirmimi që i ka bërë kryeministri Edi Rama, duke lëshuar një urdhër për ministrat dhe deputetët, duke iu ndaluar atyre të flasin rreth kësaj çështje.
“Nëse ka një vërtetim për atë që thotë Basha për arrestimin e Dakos, është Rama, me atë që i tha deputetëve të tij “mos reagoni”, dhe si njohëse komunikimi unë e kuptoj kur ai thotë që heshtni, se këtë komunikim do ta bëj unë. Ai thotë që askush tjetër nuk ka mundësi ta bëj këtë mbrojtje ndaj arrestimit që po ndodh”, deklaroi Duma.