Dy anije ruse ndodhen në një zonë mes Kalabrisë dhe ishullit të Korfuzit, pak milje larg brigjeve të Shqipërisë. Duket se tashmë tensioni mes Rusisë dhe vendeve perëndimore nuk kufizohet më vetëm në fushëbetejën e Ukrainës por edhe në detin Mesdhe.
Situata paraqitet aq e tensionuar saqë Italia ka ngritur në fluturim avionët e saj P-72 për të monitoruar situatën nga lart. Njëra prej anijeve ka ardhur nga oqeani Atlantik dhe bëhet fjalë për anijen ‘Kola’ ndërsa tjetra është një anije korvetë raketahedhëse që ndodhej në bazën ruse të Tartous në Siri.
Sipas medias italiane, “La Republica”, analistët thonë se me shumë mundësi anijet po ndjekin nga afër aeroplan-mbajtësen amerikane ‘john Bush’ që në këto momente gjendet mes brigjeve të Pulias në Itali dhe Shqipërisë.
Në afërsi të Sicilisë, dy anije të tjera të Moskës janë të pranishme prej javësh, ku njëra prej tyre është luftanija ‘Admiral Kasatanov’, një nga më modernet e flotës ruse.
Kujtojmë se në dhjetor të vitit të kaluar rusët bënë një tjetër provokim në ngushticën e Otrantos, vend ku janë përqendruar rrjetet që transportojnë gazin, energjinë dhe trafikun e internetit mes Italisë dhe Ballkanit. “Akademik Pashin”, një anije naftëmbajtëse e madhe ruse, qëndroi praktikisht e palëvizshme për orë të tëra në pikën më të ndjeshme: atë ku ndodhen tubat e Gazsjellësit Trans Adriatik, ‘çezma’ që përcjell furnizime alternative me gaz metan.