Dy shpërthime me lëndë plasëse janë regjistruar në orët e para të mëngjesit në Durrës, duke shkaktuar dëme materiale në një lokal dhe një garazh.
Shpërthimi i parë ndodhi rreth orës 03:50 në lagjen nr. 11, ku një sasi e vogël lënde plasëse u hodh në derën e jashtme të një lokali në pronësi të shtetasit G. K. Sipas Policisë, nga shpërthimi janë shkaktuar vetëm dëme të lehta materiale.
Pronari i lokalit, Gëzim Kajno, është një emër i njohur për autoritetet. Ai është dënuar më herët për vrasjen me armë zjarri të Asllan Kërtushës, ngjarje e ndodhur në vitin 2016. Kajno ishte dënuar me 10 vite burg dhe, pasi kishte vuajtur një pjesë të dënimit, ishte rikthyer në aktivitet duke hapur një tjetër bar-kafe.
Hetuesit po verifikojnë nëse shpërthimi lidhet me të shkuarën e tij apo me ndonjë konflikt tjetër.
Rreth 40 minuta më vonë, në orën 04:30, një tjetër sasi lënde plasëse është hedhur në derën e garazhit të një automjeti në zonën e Shkallnurit, në anë të rrugës Plepa–Ndroq. Edhe në këtë rast janë shkaktuar dëme materiale.
Grupet hetimore, nën drejtimin e Prokurorisë, kanë nisur punën për mbledhjen e provave dhe zbardhjen e rrethanave të dy ngjarjeve, ndërsa po punohet për identifikimin dhe kapjen e autorit ose autorëve.
Për momentin, nuk ka të dhëna zyrtare nëse dy shpërthimet kanë lidhje me njëri-tjetrin.