Përplasja e djeshme me studentët në Durrës, ku e akuzuan se ka përdorur gaz lotsjellës ndaj tyre, nuk është kaluar me kaq nga ministri i Brendshëm Sandër Lleshaj.
Në një postim në Facebook mëngjesin e kësaj të mërkure ai krahason opozitën me Haxhi Miletin, duke u shorehur se ata tre që i dolën para dje në Universitetin e Durrësit nuk ishin studentë.
“Haxhi Mileti, që ndryshe njihet dhe si Sjellësi i Fatkeqësisë, qenka mërzitur nga takimet e mija me studentët në Durrës. Tre fatkeqe nga prodhimi i tij, në rrugë dhe jo studente, janë një dëshmi e mjerë se si mund të tjetërsohet një i ri kur bëhet ithtar i H. Miletit. Dje kisha një ditë shumë të bukur në Durrës”, thotë Lleshaj në Facebook.
Një ditë më parë ai u përball në hyrje të universitetit “Aleksandër Moisiu” me tre të rinj të cilët e akuzonin se ai i ka helmuar me gaz në protestën e opozitës. Në këtë takim, i shoqëruar nga kreu i bashkisë së Durrësit, Vangjush Dako, studentët të pajisur me maska e pankarat kanë nisur të thërrasin “Turp!” duke e akuzuar ministrin se i ka helmuar me gaz në protestë.