Lufta në Ukrainë është një ngjarje e rëndë dhe dramatike që po shkakton shumë viktima, të lënduar dhe pasoja të tjera të mëdha. Në një fjalë të mbajtur në OKB, ambasadori i Ukrainës në Kombet e Bashkuara, Segiy Kyslytsya ka publikuar disa mesazhe të një ushtari rus gjatë bisedës që ky i fundit ka zhvilluar me nënën e tij.
Ato që thuhen mes djalit dhe nënës janë tronditëse. I biri i shpreh të ëmës se para se të niseshin nga Rusia për të shkuar në Ukrainë, u kishin thënë se njerzit atje do i mirëprisnin ushtarët ruse por në fakt, ai thotë se kur shkuan atje gjetën një situatë mjaft të vështirë dhe se kishte frikë.
“Për herë të parë që nga krijimi i OKB-së, ka një luftë të plotë në mes të Europës dhe çdokush në botë e di se Rusia filloi këtë sulm e mbështetur nga Bjellorusia. Kjo luftë nuk u provokua, u urdhërua nga dikush që po qëndron i ulur në bunker. Ne e dimë çfarë ndodhi në Berlin në maj të 1945. Përpara se të vijoj deklaratën time, do të doja të flisja rusisht dhe t’ju lexoja mesazhin e marrë me “screenshot” nga telefoni i një ushtari rus përpara se të vritej”, tha ambasadori ukrainas.
Biseda e ushtarit rus me të ëmën pak para se të vritej, të publikuara nga ambasadori ukrainas në OKB:
Nëna: Si je, pse po vonon kaq shumë për t’u përgjigjur. A je akoma në stërvitje?
Ushtari: Nënë, nuk jam më në Krime, nuk jemi në stërvitje.
Nëna: Atëherë ku jeni? Babi po pyet nëse mund të të dërgojmë një pako.
Ushtari: Çfarë pako po thua?
Nëna: Çfarë po thua? Çfarë nuk po shkon si duhet?
Ushtari: Nënë, unë jam në Ukrainë. Këtu ka luftë të vërtetë. Kam frikë, po i godasim të gjithë, madje edhe civilët. Na kishin thënë se njerëzit do të na mirëprisnin këtu, por ata po hidhen poshtë makinave tona, duke mos na lënë të kalojmë. Na quajnë fashistë, Gjithçka këtu është shumë e vështirë.
