Me gjithë masat drastike të marra nga policia, nuk reshtin aksidentet në shkallë vendi.
Rreth orës 14:20, në fshatin Fierseman të Divjakës, një “Benz” ka dalë nga rruga duke përfunduar në një kanal me ujë.
Për pasojë, humbi jetën shoferi 31-vjeçari Dorian Dervishi, banues në Remas, Divjakë.
Rasti më tragjik ishte ai ku mbeti i vdekur Pash Deliaj, 40 vjeç, pasi motori me të cilin udhëtonte u përplas me shtyllën në aksin rrugor Lezhë-Shënkoll.
Deliaj ishte polic në Burgun e Shënkollit, ndërsa shkak ishte pagjumësia pasi 40-vjeçari kishte qenë në ceremonitë mortore të xhaxhait të tij.
Një tjetër aksident i rëndë u shënua mesditën e sotme, kur një parakalim i gabuar në aksin Lezhë-Milot mund të kishte rezultuar fatal për një çift.
“Benz”-i me të cilin ata udhëtonin në aksin rrugor Lezhë-Milot u përplas me bordurën e urës. Çifti mbeti i plagosur dhe fatmirësisht ndodhet jashtë rrezikut për jetën në spitalin e Lezhës.
Bilancit negativ i shtohet dhe aksidenti ku Artur Sinani mbeti i plagosur, pasi kamioni që po drejtonte ka dalë nga rruga në aksin rrugor Droje-Fushë Krujë. 52-vjeçari u transportua në Spitalin e Traumës në Tiranë për ndihmë mjekësore.