Një emision i ri ka nisur në Vizion Plus i quajtur “Këndo këngën time”, ku artistët e famshëm do të vihen përballë talenteve të reja që këndojnë këngët e tyre.
E ftuar ishte Aurela Gaçe e cila ka rrëfyer dhe problemin e saj me zërin. Ajo thotë se në fillimet e saj nuk kishte ditur të punonte me zërin dhe nëse nuk do të kishte marrë mjekimet e duhura dhe të mbante regjim nuk do e kishim parë më si këngëtare.
“Kam shkuar dhe jam vizituar tek një nga mjeket më në zë, e cila kujdeset për të gjithë këngëtarët e Brodway-t dhe të gjithë spikerët më në zë. Kur kam shkuar tek doktoresha më tha kështu: “Sa këngë këndon?” I thashë: “Jo, ne nuk këndojmë me këngë, ne e kemi me orë.
I thërrita vetes dhe aty kam pasur frikën më të madhe se mos unë nuk do të mundesha më të dilja më në skenë. Më tha: “Ose do të stoposh tani dhe do të bësh këtë që të them unë, ose ti edhe dy vjet jetë ke në skenë artistikisht”.
Aty thashë “do bëj çfarë të duash ti”. Stopova tre muaj. Dy javët e para më ka mbajtur me ilaçe, tre muaj nuk kam kënduar absolutisht, me ditë të tëra nuk kam folur. Më ka pyetur mjekja “Sa shumë e do muzikën?”. I kam thënë: “Eshtë baraz me jetën time. S’do të mund të jetoja, nëse s’do të këndoja”. Që nga ai moment, në mënyrë sistematike, unë stërvitem për zërin tim.”- ka rrëfyer këngëtarja.