Banorët e “Kodrës së Priftit” në kryeqytet kanë protestuar këtë të premte kundër shembjes së banesave të tyre, të cilat preken nga projekti i Unazës.
Në një prononcim për mediat, ata kërkojnë që të dëmshpërblehen me vlerën e plotë. Ndaj, i drejtohen më një thirrje veçanërisht kryeministrit Edi Rama që të shkojë e ta shohë nga afër projektin dhe ta çojë atë aty ku ka qenë.
“Ne kërkojmë nga qeveria që të shkojë projekti aty ku ka qenë, me qëllim që të ketë sa më pak probleme sociale, edhe ata që i zë të dëmshpërblehen me vlerën e plotë. Ne kemi paraqitur dokumentet e legalizimit para 22 vitesh dhe tani pas 22 vitesh na vjen përgjigjja që nuk na legalizohen shtëpitë, sepse na zë projekti i Unazës. Kemi hequr me qindra metra kub dhe, që e kemi niveluar. Ai ka ndërtuar shtëpinë me gjak e djersë dhe këta i prishin, madje na vënë dhe gjobë, se nuk heqim mbetjet. Faji jonë është se ndërtuam pa leje, bëmë një gabim, por qeveria ka faj, sepse na lejoi, edhe policët kur vinin, merrnin 50-100 mijë lekë dhe na linin. Kjo ndodhte kur ishte vetë Rama kryetar bashkie. Ne presim përgjigje nga qeveria, nga, ARRSH. Ju bëjmë thirrje, që ata të vijnë ta shohin këtu, jo ta shohin me dron, siç po bëjnë. Ne do të mundohemi me çdo kusht, që zëri jonë të dëgjohet”, u shpreh një nga banorët.