Trejsi Sejdini ka qenë e ftuar në emisionin “Pushime On Top”, e cila ka folur lidhur me karrierën e saj si modele në Amerikë, ashtu sikurse edhe për sukseset që ajo ka pasur vitet e fundit.
Modelja tha se pushimet për të janë gjithmonë me familjen dhe shoqërinë e saj dhe pikërisht ajo zgjedh bregdetin shqiptar.
Trejsi bashkëpunon edhe me fotografin e talentuar, Fadil Berisha, i cili para disa ditësh është shprehur në të njëjtën emision se ajo është modelja më e bukur shqiptare që ka pozuar para aparatit të tij.
“Jam shumë mirënjohëse për Fadilin, është një njeri që ka ndikuar për mirë në karrierën time, pasi më ka hapur dyert që në fillimet e mia në New York. Normalisht që kontratën që e kam me “Next Model” është fal atij dhe jam pafund mirënjohëse. Kemi shumë projekte në vazhdim dhe mezi po pres të shkoj në shtator, ta takoj Fadilin se ma keni marrë juve, kur ka ardhur tani. Nuk ma keni lënë të bjerë në tokë fare,”– u shpreh modelja.
Para disa vitesh, kur modelja sapo kishte nisur karrierën e saj ajo pozoi për linjën e veshjeve të modeles së famshme botërore, Gigi Hadid. Ajo ka treguar se ka qenë një eksperiencë shumë e bukur dhe ishte tepër e lumtur që e kishte nxjerrë foton e saj në rrjetet sociale.