Rrjeti i trafikut seksual të Jeffrey Epstein shtrihej deri në brigjet jugore të Afrikës, duke përfshirë edhe Cape Town, sipas dëshmisë së një gruaje që pretendon se u rekrutua prej tij në fillim të viteve 2000.
Juliette Bryant, sot 43 vjeç, thotë se ishte vetëm 20 vjeçe, studente e vitit të parë dhe modele aspirante, kur u njoh me Epstein në vitin 2002. Ajo rrëfen se nuk i kishte treguar askujt për përvojën e saj deri pas vdekjes së tij në vitin 2019.
“Ishte sikur isha e lidhur me pranga të padukshme,” shprehet Bryant, duke përshkruar atë që e quan varësi psikologjike dhe frikë të vazhdueshme.
Ajo thotë se familja e saj po përballej me vështirësi financiare dhe oferta për udhëtime dhe mundësi jashtë vendit iu duk si realizim i ëndrrave.
Sipas saj vetëm tre javë pas takimit të parë me Epstein në një restorant në Cape Town, u nis për në New York City, në udhëtimin e saj të parë jashtë Afrikës së Jugut. Sipas saj, në të njëjtin takim në Cape Town ndodheshin edhe ish-presidenti amerikan Bill Clinton, i cili ishte në një vizitë zyrtare për ndërgjegjësim mbi AIDS-in, si dhe aktorët Kevin Spacey dhe Chris Tucker.
Bryant pretendon se pak orë pas mbërritjes në New York, iu tha se do të udhëtonte drejt Karaibeve. Një shofer e dërgoi në pistën e aeroportit Teterboro, ku hipi në një avion privat. Ajo thotë se në bord ndodheshin Epstein dhe dy gra që, sipas saj, e kishin rekrutuar fillimisht në Cape Town, me destinacion ishullin privat të tij.
Sipas dëshmisë së saj, gjatë fluturimit Epstein e ka prekur në mënyrë të detyruar. “Ishte një situatë shumë konfuze për një të re. Kur avioni u ngrit, ai filloi të më prekte me forcë dhe unë u tmerrova,” rrëfen ajo, duke shtuar se ndjeu frikë për jetën e saj.
Bryant pretendon se nuk u trafikua tek burra të tjerë, por u abuzua seksualisht në mënyrë të përsëritur nga Epstein. Ajo thotë se kalonte pjesën më të madhe të kohës e vetme në ishull, ndërsa ai merrej me punë dhe takime.
Rasti i saj, sipas dokumenteve të publikuara në dosjet hetimore të njohura si “Epstein files”, sugjeron se udhëtime të grave të reja nga Cape Town drejt Londrës, Atlantës dhe New York-ut vijuan deri në fund të vitit 2018. Autoritetet amerikane e arrestuan Epstein në vitin 2019, ndërsa ai u gjet i vdekur në qelinë e tij në pritje të gjykimit.