Gjermania është shumë para Shqipërisë në shumë aspekte, por ka një prej tyre ku vendi ynë del fitimtar. Kështu, sa i përket rrjetit për telefonat celularë 4G, referuar një studimi të kompanisë konsulente Aachen P3, i realizuar për llogari të grupit parlamentar të ekologjistëve, Gjermania në këtë drejtim vjen pas Shqipërisë.
“Deutsche Welle” raporton se ekonomia më e fuqishme e Evropës është keq sa i takon furnizimit me valë 4G (LTE) krahasuar me shtetet e tjera evropiane. Rezulton se në këtë drejtim edhe vende si Polonia e Shqipëria kanë shërbime më të mira se në Gjermani, si në aspektin e mbulimit të rrjetit, ashtu edhe të normave të rrjeteve.
“Rrjeti më i mirë në Gjermani është larg në krahasim me rrjetin ndërkombëtar. Në Holandë, Belgjikë dhe Zvicër, pothuajse të gjithë operatorët e rrjetit 4G (LTE) mbulojnë më shumë se 90 përqind të territorit. Telekomi në Gjermani ka vetëm një mbulesë prej 75 përqind me 4G.’, thuhet në studim.
Shifrat janë të bazuara në të dhënat që janë regjistruar automatikisht duke përdorur një aplikacion në smartfonëve Android, nga korriku deri në shtator dhe pastaj përpunohen në mënyrë anonime në nivelin qendror.