Është identifikuar një nga autorët e grabitjes së biznesmenit nga Nikla, Nazmi Çangu dy javë më parë.
Bëhet fjalë për një person nga Laçi por që jeton në Tiranë, bën me dije Abc. Identifikimi i këtij personi është bërë me anë të ADN-së së qimeve të flokëve të gjetura në një kapele të përdorur nga grabitësit.
Madje pak ditë më parë, Policia organizoi dhe një operacion për kapjen e këtij personi në Tiranë, por dështuan.
Rikujtojmë se dy javë më parë, disa persona të armatosur dhe të maskuar hynë në vilën luksoze të biznesmenit Nazmi Çangu, duke e torturuar për disa orë. Familjarët e tij u lidhën në dhomën tjetër, ndërkohë shuma që u mor prej tyre ishte të paktën 100 mijë euro sipas deklarimeve të biznesmenit, ndonëse është aluduar se shuma e vjedhur është më shumë se 10-fishi i shumës që ka deklaruar Çangu.
Ishte vajza e biznesmenit, ajo që para hetuesve ka thënë se një nga autorët ishte i pamaskuar, dhe se nga e folura dukeshin nga zona e Laçit. Nga kamerat e sigurisë në banesën e Nazmi Çangut, rezulton se autorët kanë qenë më shumë se 6 persona.
Aktualisht, hetuesit janë në pritje edhe të përgjigjes nga kompanitë celulare mbi kërkesën e bërë që të zbardhen thirrjet telefonike përreth banesës së familjes Çangu ditën që ndodhi ngjarja. Kjo pasi autorët gjatë kohës që kryen grabitjen, flisnin me kufje me njëri-tjetrin.
Ngjarja ndodhi në orët e para të mëngjesit të 24 tetorit. Autorët, kanë hyrë nga pjesa e pasme e banesës duke prerë telat rrethues në dy vende të ndryshme.