Kryeministri, Edi Rama ka folur shkurtimisht për herë të parë lidhur me figurën e Agron Malaj, drejtorit të OSHE-së dhe kreut lokal të PS-së në Mat.
Në një replikë të rrjetin social “Facebook”, ku një komentues i shkruan se pse futi “vrasësin e 21 Janarit” në listën e kandidatëve për deputetë të PS në Dibër, Rama shkruan se Agron Malaj nuk ka vrarë kërkënd në jetën e vet.
Agron Malaj është bërë publik, jo për faktin e të qenit kreu lokal i PS-së në Mat, më shumë se për të kaluarën e tij si ish-komandant Garde, në ngjarjen e 21 janarit të vitit 2011 kur plumbat e “Grupit të zjarrit”, ku edhe ai bënte pjesë, vranë katër protestues socialistë në mes të bulevardit përballë kryeministrisë.
Fillimisht emri i tij u përfol si një prej kandidatëve për deputetë të PS-së në Dibër por në listën zyrtare të publikuar nga PS, emri i tij nuk rezulton. Është edhe kjo arsyeja pse kryeministri Rama duket se vendosi të replikojë me komentuesin.
KOMENTUESI: Po e quan skuadër atë që i prezantove shqiptarëve me Agron Malaj që vrau në 21 janar bravo të qoftë dhe gabim ke bërë që s’na vrave të gjithëve atë ditë
EDI RAMA: O Artur ku e lexove a dëgjove emrin Agron Malaj ti o lumadh, edhe pse ai s’ka vrarë askënd?! Shikoje prezantimin e listës së Dibrës në videon përkatëse këtu dhe pastaj kërko falje po këtu që merresh me llafe rrugësh.
Agron Malaj aktualisht drejtor rajonal i OSHE dhe koordinator elektoral për Bashkinë MAT dhe KLOS, u përfol si kandidat i mundshëm për deputet në qarkun Dibër deri në momentet e fundit. Vetë Malaj në rrjetet sociale ka uruar kandidatët e qarkut dhe ka theksuar se do të punojë me ta për të fituar zgjedhjet.
Në 21 janar Agron Malaj ishte efektiv i Gardës së Republikës por për asnjë moment nuk pati një çeshtje penale të ngritur ndaj tij.
