Kryeministri Edi Rama ka nderuar Yuri Kim me “Yllin e Madh të Mirënjohjes Publike”. Ky titull vjen pak ditë para se ajo të largohet nga vendi ynë me përfundimin e mandatit si ambasadore e SHBA-së në Tiranë. Në një postim të gjatë në Facebook, Rama i shpreh mirënjohjen Kim për gjithçka që ka bërë për Shqipërinë.
“Kështu që në fund të misionit të saj, nuk më mbeti tjetër veçse t’i dorëzoj ambasadores Yuri Kim, Yllin e Madh të Mirënjohjes Publike, për sa shumë e deshi Shqipërinë, sa shumë u përpoq për të ndihmuar që Shqipëria në ikje të saj, të bëhej një vend më i mirë se sa ai që ishte kur ajo erdhi dhe mbi të gjitha, për bindjen time se kjo lloj Amerike, me duart e futura në organizmin e jetës sonë institucionale, ka qenë tërë këto vite të ngjitjes së mundimshme nga honi i zi i ferrit komunist në të përpjetën drejt dritës së demokracisë, një e keqe aq e domosdoshme, sa vetë forca që i ka dhënë Shqipërisë e kombit shqiptar në çdo drejtim, e padyshim edhe sa fuqia që i ka dhënë drejtësisë në Shqipëri për të luftuar, më në fund, me të këqijat që deri dje ngjanin të përjetshme dhe pa Amerikën në krah do të mbeteshin përjetë të tilla”,-shkruan Rama ndër të tjera.