Porti i jahteve në Durrës ka nisur të ndikojë në ekonominë e qytetit duke hapur vende të reja pune e duke rritur vlerën e pronës. Kryebashkiakja Emirjana Sako tregon në emisionin “Vendi Im” për impaktin e projektit të investitorit të njohur Mohamed Alabaar, Durrës Yachts & Marina, mbi Durrësin.
“Patjetër që Durrësi do të përfitojë shumë nga ky projekt, qoftë edhe nga hapësirat rekreative. Por tashmë fakti që atje ka një ekip të madh që po punon ka bërë të mundur edhe hapjen e vendeve të ndryshme të punës. Që pas prezantimit të idesë së këtij projekti ne vumë re një ndryshim të tregut imobiliar në qytetin e Durrësit, të vlerës së shitjes së pronave. Dhe në fakt ka ndryshuar ndjeshëm çmimi i shitjes së pronave jo vetëm në zonën rreth e qark marinës, por në të gjithë qytetin e Durrësit,” shpjegon kryetarja e bashkisë Sako.
Projekti i Marinës dhe jahteve në Durrës parashikon 280 vende ankorimi për jahtet, 700 metra plazh të ri, 80 mijë metër katror hapësirë e gjelbër, hotele me 4 dhe 5 yje, dhe sipërfaqe ndërtimi për banim 1.3 deri në 2 milionë metra katrorë.
Ai shtrihet në 20 vjet dhe do të përfshijë një hapësirë prej 800 hektarë. Në fazën e parë, që pritet të zgjasë 5-7 vjet, do të shfrytëzohet afro 50 për qind e sipërfaqes, ndërsa pjesa tjetër do të jenë hapësira publike, parqe dhe infrastrukturë urbane.
Në këtë fazë parashikohet ndërtimi i më pak se një të tretës së sipërfaqes së projektuar, dy komplekseve rezidenciale, një hotel i madh me 5 yje, hapja e një plazhi të ri, një marinë e vogël, si dhe rehabilitimi i zonës në krah të portit aktual.