Zhaneta Josifi 56 vjeç dhe vajza e saj Anisa Josifi 30 vjeç, janë gjetur të vdekura mbrëmjen e djeshme në banesën e tyre. Ndërsa vajza tjetër Blerta Josifi rreth 34 vjeç, është dërguar në spital për shkak të gjëndjes së saj të rëndë shëndetësore.
Kjo ngarje tronditëse shokoi mbarë opinionin në vend. Ajo ç’ka e bën edhe më dramatike lidhet me faktin se dyshohet se viktimat ishin pjesëtare të organizatës fetare “Dëshmitarët e Jehovait”.
Sipas drejtorit të Policisë së Tiranës, Rebani Jaupi, Zhaneta e Anisa Josifi u vetëflijuan ndërsa besonin në ringjallje. Në apartamentin e tyre u gjetën dorëshkrime të shumta dhe predikime të “Dëshmitarëve të Jehovait”.
Po ashtu janë shprehur edhe të afërm të famijes.
Por në një prononcim për Tirananews.al, Arben Lubonja pjesë e zyrës së shtypit të kësaj organizate, pasi shprehu keqardhjen për këtë ngjarje tha se, Zhaneta dhe Anisa Josifi nuk ishin pjesë e kësaj organizate.
Ai shtoi se kjo ngjarje po shfrytëzohet për të hedhur baltë mbi këtë organizatë.
Sipas Lubonjës, organizata e tyre predikon se jeta është e shënjtë. Duke u distancuar totalisht nga kjo ngjarje, Lubonja shpjegoi se në asnjë nga qëndrat e tyre nuk rezulton që dy gratë të kenë shkuar ndonjehërë dhe jo me të kenë qenë pjesë e tyre.
Ekspertiza paraprake ka treguar se 30-vjeçarja Anisa Josifi ka ndërruar jetë 15 muaj më parë, por trupi është mumifikuar pasi ditë pas dite duke e lyer me disa vajra dhe është mbështjellë me çarçafë të hollë.
Këtë e ka konfirmuar dhe vajza tjetër, 34-vjeçarja Blerta Josifi e cila ndodhet në spital. Blerta ka deklaruar se ajo dhe nëna kanë refuzuar çdo gjë, ushqim, ujë etj për 40 ditë.
“Nëna vdiq, unë mbijetova”, i tha policisë 34-vjeçarja. Policia hyri nga dritarja e banjës ditën e djeshme në banesën e tyre sepse ballkoni ishte mbyllur me kangjella hekuri./Tirananews.al