Partia Socialiste arriti të merrte drejtimin e qarkut të Elbasanit, duke siguruar kështu tetë mandate, PD mori gjashtë të tillë, ndërsa Monika Kryemadhi doli ‘duarbosh’ nga ky qytet, pavarësisht faktit se ishte renditur e para në listën e LSI-së.
Por tashmë strukturat kanë nisur punën për numërimin e votave të kandidatëve dhe rezultatet paraprake kanë dalë.
Kështu nga numërimi i 196 qendrave të votimit, nga 511 që janë në total në këtë qark më shumë vota nga PS ka mundur të sigurojë kandidati Saimir Hasalla. Hasalla ka marrë 6284 vota, ndiqet më pas nga Taulant Balla, i fundit ky që ka marrë 5219.
Ndërsa në PD më shumë vota ka mundur të sigurojë kandidati Dashnor Sula, plot 4994 vota, më pas vjen Luçiano Boçi me 3075 vota, pastaj Fadil Marzheku me 2712 vota dhe i katërti renditet Gazment Bardhi me 1385 vota.
Ndërsa LSI, e cila nuk mori asnjë mandat numërim më të madh të votave ia ka dhënë kandidatit Altin Toska, pas tij vjen Vladimir Muka me 349 vota, më pas Ermir Gjinshi me 310 vota, Sokol Skurra me 196 vota dhe e pesta renditet Kryemadhi me 191 vota.