Lejdi Liçaj prej ditësh është larguar nga Flamurtari. Është menduar fillimisht se futbollisti vlonjat do të kthehej shpejt për shkak të një problemi personal, por nuk ka ndodhur kështu. “Panorama Sport” mëson se ky është largimi përfundimtar i tij nga klubi vlonjat, pasi lojtari ka menduar të emigrojë drejt Anglisë.
I kontaktuar nga gazeta, Liçaj nuk jep asnjë arsye për largimin e tij nga Flamurtari. Liçaj u largua nga Flamurtari në sezonin 2017- 2018 për të shkuar te Luftëtari. Më pas në 2019-ën u rikthye sërish në Vlorë ku luan vetëm pak ndeshje me ekipin e Ilir Dajës. Më pas ai u largua drejt Anglisë. Liçaj ka qenë në Vlorë edhe në sezonet 2008-2012 dhe 2013-2014. Për t’u theksuar është fakti se vlonjati e ka veshur katër herë fanellën e Flamurtarit dhe tri herë atë të Luftëtarit.
Në Gjirokastër, Liçaj ka qenë në sezonet 2013-2014, 2015- 2017 dhe në vitin 2018. Më pas ai ka qenë pjesë edhe e Apolonisë, Skënderbeut, si dhe Bylisit. Në moshën 32- vjeçare, Lejdi Liçaj duket se ka vendosur të emigrojë në Angli për një jetë më të mirë, ndoshta edhe për të vijuar karrierën sportive. Në Angli Liçaj është takuar me ishportierin e Flamurtarit, Klodian Xhelili, i cili me shumë mundësi është një mbështetje për të, por mund të ketë qenë edhe një shtysë për ta tërhequr jashtë vendit.