Ministrja e Brendshme e Britanisë mbrojti një plan të diskutueshëm për të dëbuar azilkërkuesit që mbërrijnë në Mbretërinë e Bashkuar gjatë një vizite në Ruanda, për të inspektuar qendrat ku do të mbahen ata.
“Shumë vende në mbarë botën po përballen me një numër të paprecedentë të migrantëve të paligjshëm”, tha ministrja Suella Braverman.
Marrëveshja midis Britanisë dhe Ruandës “do të udhëheqë rrugën drejt gjetjes së një zgjidhjeje që është humanitare dhe e dhembshur dhe gjithashtu e drejtë dhe e ekuilibruar”, shtoi ajo.
Braverman po fliste pas një vizite në pasurinë Bwiza ku po ndërtohet qendra për emigrantët e zhvendosur dhe u shpreh se ishte “tepër e impresionuar” me atë që kishte parë.
Ajo foli me gazetarët në një konferencë shtypi ku mori pjesë ministri i Jashtëm i Ruandës, Vincent Biruta, i cili gjithashtu mbrojti marrëveshjen e nënshkruar mes dy vendeve.
“Kjo jo vetëm që do të ndihmojë në çmontimin e rrjeteve kriminale të kontrabandës me qenie njerëzore, por gjithashtu do të shpëtojë jetë,” tha ai.
Qeveria konservatore e Mbretërisë së Bashkuar e ka bërë prioritet trajtimin e imigracionit të paligjshëm dhe ky ishte një premtim kyç pasi vendi u largua nga Bashkimi Evropian.
Ajo po kërkon të nxjerrë jashtë ligjit kërkesat për azil nga të gjithë të ardhurit e paligjshëm dhe t’i transferojë ato në vende të treta “të sigurta”, si Ruanda, në një përpjekje për të ndaluar mijëra emigrantë që të kalojnë Kanalin me varka të vogla.