Për emigrantët shqiptarë është momenti për t’u kthyer në punë në vendet e Bashikimit Evropian. Porti i Durrësit, i cili ka linjat e trageteve drejt Barit dhe Ankonës në ditët e para të janarit është përballur me një numër të madh të njerëzve.
Natën e kaluar, me 3 tragetet e linjës u larguan afro 2.000 persona, ndërsa pritet që fluksi i udhëtarëve drejt Italisë të shtohet në fundjavë. Pavarësisht uljes së ndjeshme të temperaturave mbrëmjen e djeshme, në orarin e lëvizjes së trageteve nuk janë regjistruar vonesa.
Anijet e tonazhit të vogël e të mesëm, pas paralajmërimit të autoriteteve detare kanë marrë masat për të shmangur incidentet, e shumë prej tyre kanë pezulluar lundrimet në pritje të përmirësimit të kushteve të motit.
Gjatë muajit dhjetor, mbi 55 mijë udhëtarë vendas e të huaj kanë lëvizur nga Porti i Durrësit, me tragetet e linjave detare Bari-Durrës dhe Ankona-Durrës, e kthim. Në të njëjtin muaj, tragetet transportuan drejt Durrësit edhe mbi 3.500 kamionë dhe trajlerë, me mallra të ndryshëm importi për nevojat e tregut vendas.