Telashe për Kingsley Coman. Futbollisti francez u refuzua të hynte në qendrën stërvitore dhe u gjobit nga Bayern Munich për makinën që drejtonte. Klubi gjermna e gjobiti lojtarin me 50.000 euro për shkak se erdhi me Mercedes dhe jo me Audi. Gjithçka lidhet me sponsorin, që do të thotë se prodhuesi gjerman i makinave siguron mjetet për lojtarët për të shkuar në stërvitje, ndeshje dhe të gjitha evenimentet që bën Audi.
Por 24-vjeçari, duke u paraqitur me Mercedes, shkeli këto marrëveshje dhe iu mohua hyrja. Prandaj Coman duhej të parkonte AMG G-Class të tij në rrugë dhe duhej të hynte në qendrën stërvitore në këmbë.Audi aktualisht zotëron 8.33% të Bayern Munchen dhe, sipas thashethemeve, partneriteti i tyre vlen rreth 50 milion € në vit. Bild raporton se, sipas marrëveshjes midis klubit dhe prodhuesit të makinave, lojtarët duhet të arrijnë në stërvitje vetëm me makina të prodhuara nga Audi.
Francezi, në një deklaratë për tabloidin gjerman, shpjegoi arsyet e tij dhe i kërkoi falje klubit: “Unë do të doja t’i kërkoja falje klubit dhe sponsorit Audi që nuk erdha në stërvitje me makinën e sponsorit. Arsyeja ishte se pasqyra e pasme ishte e dëmtuar. Sidoqoftë, ishte një gabim, për ta korrigjuar këtë, unë do të vizitoj fabrikën Audi në Ingolstadt për një orë autografë sa më shpejt të jetë e mundur dhe do të flas me punonjësit. ” Francezi vlerësohet shumë nga trajneri Hansi Flick, por nga Gjermania raportojnë se lojtari duket gjithnjë e më afër lamtumirës. Mbi lojtarin ka interes nga Manchester United dhe Chelsea, të gatshëm për ta transferuar në Premier League.