Presidenti i Turqisë, Recep Tayyip Erdogan, tha se për krizën energjetike në Europë fajtorë janë sanksionet e vendosura nga shtetet europiane ndaj Rusisë për shkak të pushtimit të Ukrainës. Një akuzë të tillë, Kremlini e ka bërë ndaj Europës.
Erdogan ka mbajtur raporte të mira pune me presidentin rus, Vladimir Putin, teksa ka tentuar që të qëndrojë neutral sa i përket konfliktit, por ka furnizuar Ukrainën me armë dhe dronë luftarakë.
Para se të nisej drejt një vizite në Ballkan, Erdogan u tha gazetarëve më 6 shtator se shtetet europiane “po korrin atë që kanë mbjellë” duke vendosur sanksione ekonomike ndaj Rusisë.
“Qëndrimi i Evropës ndaj zotit Putin, sanksionet e saj, e kanë sjell zotin Putin me apo pa dëshirë, deri në pikën që të thotë: ‘Nëse ju veproni kështu, unë do të veproj kështu’”, tha Erdogan.