Futbollisti shqiptar, Ermir Lenjani, tregon se futbollistin e zhdukur në Kanalin Anglez, Emiliano Sala, ai e kishte shok të mirë. Bota e futbollit vazhdon të jetë e shokuar dhe e solidarizuar me futbollistin argjentinas. Lojtari i kuqezinjve, nga viti 2015 deri në vitin 2016, ka luajtur bashkë me Sala-n te Nantes.
Pjesë e këtij ekipi francez ishte edhe ish kapiteni i kombëtares së Shqipërisë, Lorik Cana, që po ashtu e ka njohur mirë sulmuesin, i cili humbi sapo kishte realizuar ëndrrën, të transferohej në Premier League.
“Emiliano ka qenë luftëtar i madh. Ai ka qenë një person shumë i ëmbël në çdo bisedë me mua dhe shokët tjerë të ekipit. Në dy vitet e fundit pati sukses te Nantes dhe arriti të transferohet te Cardiff, duke e realizuar ëndrrën e tij për të luajtur në Premier League”, tha Lenjani për “Gazetën Express” në Kosovë.
Sala shpeshherë iu drejtohej Canës dhe Lenjanit me thirrjen “Vamos Albania!”, që në shqip nënkupton “Hajde Shqipëria!”.
“Kur kemi shkuar unë dhe pastaj Lorik Cana te Nantes nuk kemi pasur nevojë t’i tregojmë nga jemi dhe se luajmë për kombëtaren e Shqipërisë. Në seancat stërvitore thoshte “Albaniaaa, vamos”. Ishte punëtor i madh në stërvitje dhe në ndeshje. Ishte person shumë pozitiv. Dilnim me të, rrinim me të dhe me shokë tjerë të ekipit”, deklaroi Lenjani.
Salla në janar u transferua nga Nantes te Cardiff. Ai ishte kthyer në Francë vetëm për t’u përshëndetur me shokët e ekipit ku luajti 4 vite. Kur po kthehej në Angli te skuadra e tij e re, avioni ra dhe pjesët e tij janë gjetur në det.