Qytetarët në qytetin jugor të Khersonit, të çliruar së fundmi nga forcat ukrainase, po zhvendosen drejt zonave ku çështjet e sigurisë dhe ngrohjes janë më pak të rënda. Shkak për këtë është bërë shkatërrimi total i infrastrukturës energjitike të qytetit nga forcat ruse.
Duke përshkruar skenat, një banore, Tetyana Stadnik, tha: “Ishte e frikshme. Pritëm, pritëm djemtë tanë deri në fund. Pritëm çlirimin.
Ne po largohemi tani sepse është e frikshme të flesh natën. Predhat po fluturojnë mbi kokat tona dhe po shpërthejnë. Do të presim derisa situata të përmirësohet.”
Dje, presidenti Volodymyr Zelenskyy tha se gjysma e kapacitetit energjetik të vendit ishte jashtë funksionit nga raketat ruse.
Ndërkohë, në një mesazh Telegram për banorët e Khersonit – veçanërisht për të moshuarit, gratë me fëmijë dhe ata që janë të sëmurë ose me aftësi të kufizuara – zëvendëskryeministrja e Ukrainës Iryna Vereshchuk postoi një sërë mënyrash se si banorët mund të shprehnin interes për t’u larguar.
“Ju mund të evakuoheni për periudhën e dimrit në rajone më të sigurta të vendit,” shkroi ajo, duke përmendur problemet e sigurisë dhe infrastrukturës.